Fleire sommarreisande enn venta – rekorddag på Oslo lufthavn

Det var ein liten auke i sommartrafikken i juli samanlikna med i 2024 – og Noregs største lufthamn har passert ein milepæl.  

Fleire enn fem millionar passasjerar reiste gjennom norske lufthamner i juli. Dette er ein auke på to prosent samanlikna med same månad i fjor. Så langt i år har det vore fire prosent fleire reisande enn i 2024 – med auke både blant innanlands- og utanlandsreisande. I juli reiste over 2.7 millionar til og frå Noreg, noko som tilsvarer ein auke på éin prosent blant utanlandsreisande. 

Fleire enn forventa 

Ser ein isolert på innanlandsreisande i juli, er det to prosent fleire i år samanlikna med same månad i fjor. 

– Sommaren har vore god og noko betre enn venta. Tala for innanlandsreisande har særleg utmerkt seg, med ein auke på to prosent samanlikna med i fjor. Samstundes ser vi ei utflating i veksten som prega første halvår. Vi ventar at denne utflatinga held fram, med lågare vekst i andre halvår enn det vi har opplevd i første halvår, seier Gaute Skallerud Riise, direktør for trafikkutvikling i Avinor. 

Han trekkjer òg fram frakt, som hadde ein vekst i juli. 

– Fraktutviklinga over Oslo lufthavn er framleis sterk, med ein vekst på seks prosent i juli og elleve prosent så langt i år. Auka rutekapasitet på langdistanseruter har bidrege til å redusere transporttid og avstand for sjømat som skal ut av landet. Samstundes blir importen i større grad sendt direkte til Oslo i staden for via andre knutepunkt i Europa, avsluttar han.  

På nivå med før pandemien

Prognosane for talet på reisande gjennom Oslo lufthavn i perioden 20. juni til 20. august var seks millionar. Allereie i juni og juli samla ser ein at over 5.3 millionar reisande har ferdast til og frå Noregs største lufthamn. Den 13. juli reiste 100.296 passasjerar gjennom lufthamna. Det er første gong at så mange besøkte lufthamna på ein dag, sidan pandemien braut ut i mars 2020. 

Flyrørsler

Det var 53.517 kommersielle flyrørsler i juli. Dette er ein liten auke frå juli i fjor, og det er tre prosent fleire flyrørsler i år så langt. 

Les også: Veksten i droneflyging held fram i juli (august 2025)

Fleire tidligare nyhende finns HER og HER