3.269.370 passasjerar nytta Avinor sine lufthamner i februar. Dette var ein auke på 45 prosent samanlikna med februar 2022. Sjølv om det var ein auke i passasjertala samanlikna med februar 2022, er tala 16 prosent lågare enn i same måned i 2019.
– Flytrafikken i februar er i tråd med prognosane våre frå i haust. Sjølv om det er veldig mange fleire som reiser enn i fjor, ligg februartala framleis 16 prosent etter 2019*. Det er venta at flytrafikken vil liggje under 2019-nivå også resten av året, og at for året som helhet er vi på ca 91 prosent av 2019-nivå, seier trafikkdirektør i Avinor, Gaute Skallerud Riise.
– Det er skilnader frå lufthamn til lufthamn. Oslo hadde meir enn 1,6 millionar passasjerar i februar, dette er 19 prosent under tala i februar 2019. Om ein ser på Bergen lufthamn ligg tala berre fire prosent bak 2019. Den hovudsaklege årsaka til dette er Widerøe si satsing i Bergen, og slusing av passasjerar over Bergen som knutepunkt.
– Også Stavanger og Trondheim er nærare 2019-nivå enn Oslo lufthamn. Men Oslo lufthamn har størst volum, altså flest passasjerar, og har difor størst påverknad på dei totale tala for Avinor, forklarar Riise.
Skallerud Riise har tru på sommartrafikken:
– Det er særskild utanlandstrafikken som trekk ned volumet, mens innalandstala har henta seg betre inn etter pandemien. Sjølv om det er lenge til sommaren, er det mykje som tydar på at vi vil sjå at denne skilnaden kjem til å halde fram. Vi ventar at innanlandstrafikken vil vere bortimot på 2019-nivå i sommermånadene, før han fell noko tilbake utover hausten. Vi ventar og at utanlandstrafikken gradvis hentar seg vidare inn framover, sjølv om han er venta å liggje eit stykke under sommertrafikken i normalåret 2019, avsluttar Riise.
Flyrørsler
Det var 49.893 kommersielle flyrørsler i februar 2023. Dette er ein auke på 15 prosent frå februar 2022. Om ein samanliknar med februar i 2019, har det vore ein nedgang i talet på flyrørsler på 13 prosent.
Trafikken utanlands
1.191.693 passasjerar har reist mellom Avinor sine lufthamner og utlandet i februar. Same månad i fjor reiste vel 700.000 passasjerar til utlandet. Det betyr at trafikken utanlands har auka med 70 prosent samanlikna med i fjor, da luftfarten framleis var råka av pandemi og reiserestriksjonar.
Om ein samanliknar med 2019, er det 20 prosent nedgang i utanlandstrafikken i februar.
Trafikken innanlands
2.038.645 reiste innanlands i februar i år. Det er 35 prosent fleire enn i februar i fjor.
Samanlikna med februar 2019 har det vore ein nedgang på 14 prosent.
Her er passasjertala frå dei store lufthamnene, samt DRL = dei regionale lufthamnene, samanlikna med 2022:
Februar | Hittil i år | |||||
| Lufthamn | 2022 | 2023 | Endring | 2022 | 2023 | Endring |
| Oslo | 1 043 000 | 1 628 000 | 56 % | 1 882 000 | 3 206 000 | 70 % |
| Bergen | 313 000 | 415 000 | 33 % | 585 000 | 829 000 | 42 % |
| Trondheim | 193 000 | 284 000 | 48 % | 355 000 | 556 000 | 57 % |
| Stavanger | 173 000 | 261 000 | 51 % | 320 000 | 523 000 | 63 % |
| DRL | 529 000 | 681 000 | 29 % | 986 000 | 1 354 000 | 37 % |
| Avinor | 2 250 000 | 3 269 000 | 45 % | 4 128 000 | 6 468 000 | 57 % |
Her er passasjertala frå dei store lufthamnene, samt DRL = dei regionale lufthamnene, samanlikna med 2019:
Februar | Hittil i år | |||||
| Lufthamn | 2019 | 2023 | Endring | 2019 | 2023 | Endring |
| Oslo | 2 004 000 | 1 628 000 | -19 % | 3 954 000 | 3 206 000 | -19 % |
| Bergen | 434 000 | 415 000 | -4 % | 867 000 | 829 000 | -4 % |
| Trondheim | 322 000 | 284 000 | -12 % | 639 000 | 556 000 | -13 % |
| Stavanger | 301 000 | 261 000 | -13 % | 610 000 | 523 000 | -14 % |
| DRL | 822 000 | 681 000 | -17 % | 1 626 000 | 1 354 000 | -17 % |
| Avinor | 3 884 000 | 3 269 000 | -16 % | 7 695 000 | 6 468 000 | -16 % |
*Kvifor samanlikne med 2019?
2020 og 2021 vart hardt råka av reiseforbod, restriksjonar og sjukdom. 2019 var det siste året utan pandemi og krig i Ukraina, og var eit «normalår» kva gjeld reising.
